Didine, ène bèle grosse pouye,
Kot’ kot’ kot’,
Si pormwinneut didins l’ bèrdouye !
Quand, à l’intréye du tch’mwin,
Kot’ kot’ kot’,
Èle-avise, sbaréye, in tchin !
C’èsteut in vîy Tèkèl,
Waf’ waf’ waf’,
Qu’on lomeut Caramèl !
I v’leut toufêr fé l’ malin,
Waf’ waf’ waf’,
Mins n’aveut pupont d’ dints !
Èt li v’là qui coumince à bawyi,
Waf’ waf’ waf’,
On l’ pinsereut aradji !
Vas-è, vîye pouyète,
Waf’ waf’ waf’,
Èt waîte à tès guètes !
Ritournans rade au poulî,
Kot’ kot’ kot’,
C’èst qu’i m’ voureut agni !
Dji m’ va prév’nu m’ cokia,
Kot’ kot’ kot’,
Qu’i li skète sès-ouchas !
Èyu ç’ qu’èlle a mètu s’ tièsse,
Waf’ waf’ waf’,
Li man.nète pitite bièsse !
Cachans dins lès p’tits cwins,
Waf’ waf’ waf’,
Nos l’ ritroverans bin !
_C’è-st-à m’ feume qui v’s-ènn avez ?
Cocorico,
N’ rouvyez nin qu’èlle èst mariéye !
I vos faut ’nnalè savez,
Cocorico,
Oudoubin dji vos bètche li nez !
Ça va, ça va, dji m’èva,
Waf’ waf’ waf’,
Faut nin vos mwaîji come ça,
Vos-è fiez dès chinéyes,
Waf’ waf’ waf’,
Pou ène pitite riséye !
Il ènnala paujêre,
Waf’ waf’ waf’,
Mins i n’èsteut nin fiér !
Pace qui c’èst pa côps malauji,
Waf’ waf’ waf’,
D’ bawyi, sins p’lu agni !