«

»

Oct 30

Èt si on freut come lès marmotes

Volà dèdjà l’ivièr qu’arive…
Fini lès bèlès swèréyes di l’èstè !
Volà l’ vint, l’ frèdeû èyèt l’ nîve !
On va co bin seûr adjalè !
Abîye, lès moufes èyèt lès wants,
I va bîjelè au d’zeû dès tchin.nes,
L’aîr sèra frisse, i f’ra pikant,
Èt pupont d’ fouyes dissus lès frin.nes !
Èt si on freut come lès mârmotes :
Dwârmu longtimps, longtimps, longtimps,
Èt passè ç’ timps-là dins-ène grote,
Èpwîs s’ ravèyî au bontimps ?
Trwès mwès, ça èst rade passè,
Pupont d’ rûjes, pupont d’imbaras !
On n’ dwèt pus tuzè qu’a rêvè,
Dwârmu, sondji, èt pont d’ tracas !
Bin seûr, on n’aura pus l’ tévé,
Èt on ratera Michel Drucker !
On n’ poura pus vèy Dorothée,
Ni « 7 sur 7 » da Anne Sinclair !
Mins on n’ causera pus d’ totes lès guêres,
Dès films èyu-ce qu’i gn-a qu’ du song !
On n’ vièra pus totes lès miséres,
Quand on dwâme, on n’è vwèt pupont !
Gn-aura pupont d’ chîjes, dilé l’ feu,
Avou s’ vêre di bîre ou d’ pèkèt,
Li paurt aus cautes on bin in djeu,
Ça, djè l’ poureu co bin r’grètè !
Pupont di scrîjadje, ni d’ walon,
Pus possibe d’alè s’amusè,
Pont d’ téyâte, ni d’ rèpèticions,
Ça, dji su seûr, ça m’ va mankè !
Dji n’ saureu fé come lès mârmotes,
Dwârmu longtimps, longtimps, longtimps,
Dji n’ saureu d’meurè dins ène-grote,
Dj’a dandji d’ vikè avou m’ timps !
Mi pormwinrnè avau lès vôyes,
Routè dins l’ nîve, mi nez au vint,
R’fusè ène saîson, i n’ faut mauy,
Faut prinde l’ivièr come i nos vint !

Lien Permanent pour cet article : http://www.jihenef.be/2007/10/30/et-si-on-freut-come-les-marmotes/

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

Vous pouvez utiliser les balises HTML suivantes : <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>