Ène invîye

Ça i-èst, ç-côp-ci, c’èst l’ grand djoû !
Volà dès mwès qu’èle mè l’ promèt !
Djè l’auraî, c’èst pou l’ vièspréye !
Vos n’ saurîz sawè come dji m’ rafîye,
Dispûs l’ timps qu’ djè l’ ratindeu !
À l’eûre dîye,
Dji m’a achîd,
Paujêremint,
Bin à m’-n-auje,
Mins dj’èsteu quausu dju d’alin.ne…
Dj’aveu m’ keûr qui barlokeut !
Dji sinteu qu’èle n’aleut pus taurdji…
Èt èlle è-st-arivéye,
Ène bèle blonde,
En rôbe di tchambe,
Avou dès rondeûs…
Come i faut,
Èyu-ce qu’i faut !
Djè l’aureu v’lu djonde,
Li cârèssî, l’ rabrèssi !
Dji m’ rastèneu…
Ostant qu’ possîbe !
Èpwîs, ni t’nant pus,
Dji m’a mètu à l’ disbiyî,
Doûcètemint, langoureûsemint,
En pèrdant l’ timps qu’i faleut !
Djusse di qwè fé crèche èm n-invîye !
Adon, djè l’a apougnî,
Solidemint, rwèdemint,
Djè l’a raprotchî d’ mi èt…
Dj’a agni d’dins !
Qu’èlle èsteut boune…
Èm pètote à l’ pèlake !

Lien Permanent pour cet article : https://jihenef.be/2007/10/30/ene-inviye/