Batisse

In p’tit-èsplicadje d’vant d’atakè :

« Batisse » a stî scrit come ène tchanson, avou dès couplèts èt dès rèspleûs .

On l’ pout tchantè come on vout ca, si dj’arive à scrîre ène miyète, pou ç’ qu’i èst dè l’ musique, dji n’ vaut nin grand tchose !

Couplèt 1
Il a skèpyi èyèr, tot timpe au matin,
Mi dji bwèveu in vêre, come dji n’ fèyeu rin,
Mi feume a arivè, èle fieut du trayin,
Pwîs èle m’a dit, abîye, faut prévenu l’ vijin !

Rèspleû
Il èst bia, mi p’tit via
On direut m’ bia frére !
Quand on l’ vwèt, quand i bwèt
C’èst come mi bia frére !
Ène boune tièsse, nin l’aîr bièsse …
Ç’ n’èst nin come mi bia frére !

Couplèt 2
On z-a ukè l’ mayeûr, èt tos lès scabins,
On z-a faît v’nu l’ curè, èpwîs lès cousins,
Proféciat à nosse vatche, c’èsteut lèye li mére,
On l’a lomè Batisse, tot come mi bia frére !

Rèspleû

Couplèt 3
Il a crèchu Batisse, c’è-st-in bia robin,
‘l’èst div’nu grand Batisse, ‘l’èst div’nu malin.
I bwèt èt mougne come deûs, i coutche dins lès strins !
I faît come mi bia frére, i n’ faît jamaîs rin.

Rèspleû

Couplèt 4
‘l’è-st-ècrauchi Batisse, di d’meurè à rin,
On l’ va tuwè Batisse, dji s’raî dins l’ pènin,
I n’aveut qu’a boutè, à l’ place di n’ rin fé,
Mi c’è-st-avou m’ bia frére, qu’ djè l’aureu v’lu fé !

Dérin rèspleû
‘l’èsteut bia, mi p’tit via
Tot come mi bia frére !
I mougneut, i bwèveut
Tot come mi bia frére !
Ène boune tièsse, nin l’aîr bièsse
Ç’ n’èst nin come mi bia frére !

Lien Permanent pour cet article : https://jihenef.be/2007/10/30/batisse/