Achîde

Achîde tote seûle tote li djoûrnéye,
Achîde tote seûle tote li vièspréye.
Èle ni saveut nin, l’ pôve vîye djin,
S’èle li vèreut co l’ lèdmwin,
S’-n-ome !
Dès djoûs-t-au long il a soufru,
Èpwîs, d’in côp, s’a distindu.
Sès mwins sèréyes pou in Pâtêr,
Il a paurti dins ène priyère,
S’-n-ome !
Achîde tote seûle tote li djoûrnéye,
Achîde tote seûle tote li vièspréye.
Tote seûle ? Nonfaît, pace qui dès djins,
Què l’ont v’nu vèy i gn-ieû brâmint.
Mins s’-n-ome…
Lès-èfants, l’ famîye, lès soçons,
Min.me lès cousins, v’nus di d’ bin lon.
Tèrtous lî vinront dîre bondjoû,
In côp ou deûs, min.me mi, si dj’ pou.
Mins s’-n-ome…
Achîde tote seûle, li pôve vîye djin,
Achîde tote seûle pou combin d’ timps ?
Ç’ n’èst pus possibe di d’meurè là,
Dins l’ maujone qui v’neut da s’ popa
Da s’-n-ome !
I faut vûdi, ’nnalè au « home »,
Ça arive, quand on n’èst pus djon.ne. !
Pou seûr qu’èlle î s’ra bin, vêlà,
Èpwîs, s’ vijène lî in causera,
Di s’-n-ome !
Achîde tote seûle, èlle i sondjera,
Achîde tote seûle, i s’ra bin là.
I vikera pou toudi dins s’ keûr,
Ayi, c’èst li qui f’ra s’ bouneûr,
S’-n-ome

Lien Permanent pour cet article : https://jihenef.be/2007/10/30/achide/